علي حسب ما شفت عالجودريدز فيه اكثر من سلسلة روائية بتحكي قصة الإسكندر الأكبر و أقل من المتوقع كمان بالنسبة لشخصية من أعظم شخصيات التاريخ زيه.
بس سلسلة فاليريو ماسيمو مانفريدي تعتبر هي أشهر و علي ما أعتقد أقواهم علي الإطلاق حتي من غير ما أقراهم.
رواية بتحكي تاريخ الإسكندر بأسلوب مميز جدًا ملئ بالإثارة و قوي أدبيًا في نفس الوقت.
الإسكندر قال جملة في الرواية فيما معناها انهم هينطلقوا في رحلة تماثل رحلة أخيلس بس في الغالب مش هيلاقوا حد زي هوميروس يحكي حكايتهم المقولة حقيقية جدًا بس انا مبسوط ان بلوتارك و مانفريدي حكوا حكايتك و تقريبًا دول اهم كتابين عن الإسكندر و هحاول اقرأ كتاب بلوتارك عن الإسكندر في يوم من الأيام.
الكاتب وصل جو اليونان القديمة كما يجب ان يكون مغلطش في سطر لا و عمل حاجة روعة دول ناس كانوا طول الوقت مؤمنين بآلهة و أساطير من الطبيعي جدًا ان تكون الأساطير دي موجودة في كل نواحي حياتهم فجو النبؤات و الظواهر اللي بتحصل حتي آخر جملة في الرواية لما الإسكندر قذف رمحه اللي اترشق في الارض و هز أسيا كلها و ده حتي ميعتبرش واقعية سحرية لان ده كان واقع البلاد دي فعلًا و بسبب كده الرواية تستحق عشر نجوم كمان مش خمسه بس.
تحليلي للإسكندر و أسباب عظمته عرفته من أهم جزئية في الرواية سقوط مدينة طيبة علي إيد جيش الإسكندر و أكثر جزء في الرواية حماسيًا
عندنا شاب اتربي علي أساطير الإلياذة و الأوديسة و أمجادهم و بطولاتهم
عندنا شاب كان تلميذ لأرسطو و دي من أهم جوانب نشأة الإسكندر
عندنا شاب فاهم سياسة كويس جدًا في أيام السياسة الأولي في العالم و أشكالها الأولي و نظرته السياسية أعتبرها كمان متطورة عن نظرة أثينا نفسها اللي يعتبر صدرت السياسة للعالم
قائد قوي بجيش قوي جدًا بريًا يقدر يمحي مدينة طيبة لو حب بس مع ذلك عمل كل اللي يقدر عليه عشان ميوصلش لحرب معاهم بس للأسف كان مصير مدينة طيبة اتقرر خلاص هما اصروا علي الحرب لان ده كان مصيرهم
الإسكندر لولا سياسته دي مكنش وصل لربع اللي وصله عمل تحالفات وقت ما احتاج للتحالفات عمل و كان بيفضل السلم عن الحرب و ده شئ مهم جدًا في غازي و متهايئلي لو بصينا علي غزاة العالم القديم و حاولنا نرتبهم هيبقي الإسكندر متربع علي القمة بفرق كبير جدًا عن رقم اثنين اللي ممكن نقول انه جنكيز خان.
و الحقيقة انا حابب اني اتعمق في قراءتي عن روايات بتمثل احداث تاريخية مهمة جدًا زي كده بالأخص عن غزاة العالم القديم
حابب اقرأ سلسلة جنكيز خان الروائية.
حابب ادور اولًا علي اسم الراجل اللي وصل امبراطورية الفرس لمجدها لو مجدها متعلق برجل واحد زي امبراطورية الإسكندر و اقرأ سلسلة روائية عنه اذا وجد.
حابب أقرا عن نابليون و هتلر و رمسيس الثاني اذا وجد سلاسل روائية تخصهم و علي حد علمي موجود بالفعل عن رمسيس الثاني بس الاثنين الثانيين معرفش موجود حاجة زي كده عنهم ولا لا.