بعد ما قرأت أكثر من كتاب فانتازيا سيء وطفولي قررت أوقف لفترة. وفجأة شفت هذا الكتاب، طبعًا أنا ما كنت ناوية أقراه أو أشوف المسلسل المستوحى منه لكثرة المشاهد المقرفة، بس جاني فضول أقرأ أول فقرة من السلسلة الشهيرة هذه.
المشكلة اني ما قدرت أوقف قرأت تقريبًا ١٠٠ صفحة في جلسة واحدة ورجعت اليوم الثاني متحمسة أقرأ أكثر. الرواية سحرتني وسحبتني لعالمها وعوائلها وسياستها وشخصياتها بشكل سلس وسريع! بعد ما قرأت النصف الأول من الكتاب استوعبت أنه ما فيه مشاهد قذرة كثير نفس ما توقعت، ما أنكر أنه فعلا مليان بأفكار ووصف منافي للأخلاقيات بس مو طويل ولا بسوء اللي مر عليا في كتب ثانية وفصول دنيرس أكثر من غيرها. 
التصنيف فانتازيا لكن السحر والخيال لحد الآن بسيط مرة. أكثر شي جذبني في الرواية انها فيها درجة من الواقعية بمعنى أنه مو كل شي يصير في صالح البطل والشخص الخيّر (اللي أثبته الكاتب بقوة...

ما راح أتخطى ند

) هذا الشي يخليني أتحمس وأحس بالخطر.
الكاتب فنان من ناحية بناء العالم والشخصيات ورسم المشهد، أما المترجم هشام فهمي دائمًا يبهرني في كيف يقدر يخلي الكتاب كأنه كتب بالعربية!! مبدع!

ذحين أبغى اتكلم عن الشخصيات:
ند ستارك، شخصيتي المفضلة، الشريف، المخلص، الوفي، الوحيد اللي قلبه نظيف في وستروس كلها. كنت أحب فصوله وكل ما مر بفترة صعبة في القلعة الحمراء اتذكر كيف كان وهو وعائلته في وينترفل وأتمنى يرجعون للحياة الطبيعية هناك، كله من لايسا الزفت وكاتلين اللي أعطتها وجه وضغطت على زوجها يصير يد الملك 😭 المصيبة ان لايسا طلعت مجنونة واحدة مي صاحية ما ينأخذ منها لا حق ولا باطل. وبسببها ند فقد أهم رجاله وانكسرت رجله وبعدها الإصبع الصغير وسرسي تسببوا في حبسه في زنزانة مظلمة أيااام بدون أكل لين تعفنت رجله وكنت شايلة هم انه يفقدها تماما وجاء الزفت العنكبوت فارس ودخل كلام براسه واقنعه ان الشرف والصدق ما راح ينقذ بناته عشان كذا لازم يعترف بالخيانة اللي ما ارتكبها اصلا!!!! وبعد اعترافه... جوفري التافه المختل النرجسي المدلل المتوحش أمر باعدامه قدام كل الناس وبناته الاثنيننننن 😭😭😭😭 هذا الإنسان الشريف يموت بهذا الشكل؟!! المرة الوحيدة اللي تخلى فيها عن مبادئه وكله في سبيل سلامة بناته واخرتها على ولا شي. انقهرت وحزنتتتت قلت يمكن يرجع يمكن مو هو اللي مات يمكن يصير زي الآخرون مدري أي حاجة أهم شي ند يعيش. بس ما فيه فايدة من الإنكار ند مات خلاص
اف خلاص حزنت ما ابغى اكمل المراجعة 🥲
المهم يعجبوني روب وجون سنو وآريا الرهيبة اللي ما أدري ايش صار عليها ذحين وكمان سام تارلي وجون مورمنت والبايسل الأعمى والعجوز نان وبران وحتى هودور المسكين